TUMULAK kahapon patungong Tashkent, Uzbekistan ang six-man Philippine boxing team para sumabak sa Asian Boxing Confederation (ASBC) Championship.
Pinangunahan ni Rio de Jainero Olympian Rogen Ladon ang grupo sa torneo na magsisilbing qualifying para sa AIBA World Boxing Championship na gaganapin sa Hamburg, Germany sa Agosto.
Sasabak si Ladon sa 49-kg class para sa torneo na nakatakda sa Abril 30 hanggang Mayo 7.
Ito ang unang sabak sa international competition ng 23-anyos mula sa Bago, Negros Occidental mula nang mabigo sa kanyang kampanya sa Olympics kontra silver medalist Yurberjen Herney Martinez ng Colombia.
Ginapi niya si Ramel Macado sa isinagawang box-off para mapabilang sa koponan.
Kasama rin sa koponan sina Daniel Maamo (52 kg), Mario Fernandez (56 kg), James Palicte (60 kg), Joel Bacho (69 kg), at Felix Marcial (75 kg).
Tatayong coach sina Nolito ‘Boy’ Velasco, Elias Recaido, at Reynaldo Galido.
Inasahang lalahukan ang torneo ng 200 boxers mula sa 29 bansa at liyamado sa tuwina ang Thailand.
