DALAWANG panalo na lamang ang kailangan ng defending champion Ateneo de Manila upang pormal na makumpleto ang 14-game elimination round sweep sa UAAP Season 79 men’s volleyball tournament matapos makamit ang ika-12 sunod nilang panalo kahapon.
Matapos makalusot sa matinding hamon ng University of the East sa first frame, inilabas ng Blue Eagles ang tunay nilang laro bilang reigning back-to-back champions sa sumunod na dalawang sets upang mapataob ang Red Warriors, 27-25, 25-19,25-14 kahapon sa San Juan Arena.
Nagtala ng game high 19 puntos ang three-time MVP na si Marck Espejo tampok ang 13 kill at limang block upang pamunuan ang ika-12 dikit na tagumpay ng Blue Eagles.
Nagdagdag naman ng tig-7 puntos sina Anthony Koyfman at Rex Intal habang nag-ambag si setter Ish Polvorosa ng 32 excellent set at 13 excellent dig at 10 reception si Manuel Sumanguid III.
Naging malaking kawalan para sa UE ang hindi paglalaro ng kanilang top hitter na si Edward Camposano na sinamang-palad na nagtamo ng ACL injury.
Pinamunuan ang Red Warriors na bumagsak sa markang 1-11, ni Clifford Inoferio na may 15-puntos at walang nakuhang sapat na suporta mula sa kanyang mga teammates. – Marivic Awitan
