Frame up lang ang lahat at walang kinalaman sa pagpatay.
Ito ang tahasang inihayag ni SPO3 Ricky Sta. Isabel sa inihain niyang salaysay sa National Bureau of Investigation (NBI).
Iginiit si Sta. Isabel na inosente siya sa pagdukot at pagpatay sa negosyanteng Korean na si Jee Ick-joo.
Ayon kay Justice Secretary Vitaliano Aguirre II, nakapaloob sa salaysay ni Sta. Isabel sa NBI na na-frame up lang sila at walang kinalaman sa pagpatay kay Jee.
Giit ni Sta. Isabel, imposibleng nasa Angeles City, Pampanga siya noong Oktubre 18, 2016.
Nabasa ni Aguirre sa salaysay ni Sta. Isabel na nasa meeting daw ang huli, kasama si Supt. Raphael Dumlao, team leader ng PNP Anti-Illegal Drugs Group, at pagkatapos ay pinasamahan pa ni Dumlao ang anak nito kay Sta. Isabela sa National Bookstore.
Bukod dito, sinabi rin ni Aguirre na nagpakita rin ang asawa ni Sta. Isabel na si Jinky ng mga pruweba sa sinasabi ng asawa nito, kabilang na ang litratong nagpapakita na ang Toyota Hilux na ginamit sa surveillance at kidnapping kay Jee ay hindi sa kanilang pag-aari.
Ayon kay Jinky, ang kanyang Hilux ay may carrier at conduction sticker, na wala naman sa Hilux na sinasabing ginamit sa krimen. (Beth Camia0
