Pilit na duduplikahin ng San Beda ang nagawa nitong pagwawalis sa unang round ng labanan sa pagsagupa nito sa Lyceum of the Philippines U sa pagsisimula ngayong umaga ng Final Four ng 92nd NCAA football tournament sa Rizal Football Field.
Iniuwi ng Red Booters ang first round pennant sa pagwawalis sa anim nitong laro tampok ang 6-0 panalo kontra sa nagtatanggol na kampeong Arellano U Chiefs noong Disyembre 12 nakaraaang taon.
Agad masusungkit ng Red Booters ang titulo kung mangunguna o mawawalis nito ang single-robin format Final Four.
Sasagupain ng Red Booters ang Pirates, na tumapos sa unang round katabla ang Perpetual Help Altas sa No. 4 na may natipong anim na match points kada isa subalit napunta sa ikaapat at huling silya dahil sa mas mataas na goal differential, 0 kontra sa -9.
Gayunpaman, ang San Beda, na hangad ang league-best 22nd seniors title, ay nahirapan muna bago tinalo ang LPU, 3-0, sa kanilang unang paghaharap noong Disyembre 8.
“We should be physically and mentally prepared because it gets tougher from here on,” sabi ni San Beda coach Michael Pediamonte. “We also can’t underestimate any team.”
Magsasagupa din ang No. 2 St. Benilde at No. 3 Arellano U sa isa pang laban ganap na 2:00 hapon matapos lamang ang sa ganap na 12 :00 ng tanghali na salpukan sa pagitan ng San Beda at LPU.
Sakaling manguna ang San Beda sa second round ay agad nitong maiuuwi ang kampeonato. Gayunman, sasagupa ito sa mangunguna sa second round sa one-game title contest.
Asam din ng juniors ng San Bed na manguna sa ikalawang round sa pagsagupa sa No. 4 Letran sa ganap na 8:00 ng umaga na unang laro habang ang defending champion na No. 2 St. Benilde ay haharapin ang No. 3 Arellano U sa ganap na 10:00 ng umaga.
Iniuwi ng Cubs ang first round pennant sa pagtatapos nito na may kabuuang 16 match points sa lima nitong panalo kontra isang draw. (Angie Oredo)
