TIYAK na magkahalong pagtataka at paghanga ang nadarama ng mga mamamayan kaugnay ng sunud-sunod na pagpatay ng mga pinaghihinalaang drug pusher at user sa iba’t ibang panig ng kapuluan. Ang walang patumanggang pakikipagbarilan ng mga miyembro ng Philippine National Police (PNP) sa naturang mga sugapa sa ipinagbabawal na gamot ay totoong nakapagtataka lalo na ngayong ilang araw na lamang at papalitan na ang kasalukuyang administrasyon.
Dahil dito, hindi rin maiiwasan ang sunud-sunod na katanungan: “Ngayon lamang ba natuklasan ng PNP na matagal nang naglipana ang mga nagbebenta at gumagamit ng bawal na droga, kabilang na ang mga drug lords? Hindi ba mismong PNP ang naglantad ng ulat na ang 92% ng Metro Manila ay talamak sa droga? Ang sunud-sunod na pagpatay sa mga drug pusher at user ay hindi kaya pagpapakitang-gilas lamang ng PNP sa susunod na administrasyon?” Marahil nga. May mga nagpapahiwatig na ang pagpaslang sa mga suspek na itinuturing na mga police asset ay maaaring sinasadya upang ang mga ito ay hindi makatestigo laban sa pulis na sinasabing sangkot sa mga drug syndicate. Kapani-paniwala na ang walang habas na pagtugis at pagpatay sa mga drug suspect ay bunsod ng matatag na determinasyon ng hahaliling administrasyon sa paglipol ng mga kriminal.
Kahit na sabihin pang pagpapakitang-gilas o pakitang-tao, ang pagsuong ng mga pulis sa panganib sa paglipol ng mga kampon ng kasamaan ay marapat lamang hangaan. Kahit na ang kanilang mismong mga kapwa alagad ng batas ay hindi nila pinanganganinuhan kailanma’t ang mga ito ay nasasangkot sa illegal drugs at iba pang krimen. Matindi ang kanilang paggalang sa kinaaaniban nilang organisasyon na walang ibang misyon kundi pangalagaan ang seguridad ng sambayanan.
Lalong magiging kahanga-hanga ang mga elemento ng PNP kung may mabibitay silang mga drug lord; alam nila ang kinaroroonan ng mga ito, pati ang mga pabrika ng bawal na droga. Ang mga drug lord, tulad ng mga gambling lord, smuggling lord, at iba pa, ay pinaniniwalaang mga kakutsaba ng ilang alagad ng batas. Hindi lamang mga pipitsugin o dagang-dingding, wika nga, ang kanilang napapatay.
Sa panunungkulan ng susunod na administrasyon, hindi lamang ang mga sibilyang drug pusher at user ang tutugisin, kundi ang mismong mga alagad ng batas na sugapa at sangkot sa sindikato ng droga. (Celo Lagmay)
