HINDI pabor si Kathryn Bernardo sa sinasabing makakatulong sa love team nila ni Daniel Padilla kung “isasabong” sila sa ibang love teams.
Wala siyang nakikitang advantage sa paglalaban-laban ng love teams. Para sa kanya, mas nakakatulong pa nga kung nagsusuportahan sila at hindi pinag-aaway-away.
“Dapat lang na magsuportahan ang bawat magka-love team, kasi nasa iisang network lang naman kaming lahat,” sabi sa amin ni Kath.
Dapat din daw pairalin ng fans ng bawat love team ang respeto sa bawat isa. Ayaw niyang may nagsisiraan lalung-lalo na nakakasakit na nang husto ng damdamin.
“Bawat fan group naman, ang importante lang, eh, may kanya-kanyang sinusuportahan. Dapat na pairalin ng bawat fans ‘yung respetuhin ‘yung bawa’t sinusuportahan. Kasi, at the end of the day, nagtatrabaho kami sa iisang network. Kaya hindi talaga dapat na ginagawan ng isyu ang tungkol diyan,” paliwanag ni Kathryn.
Sa kaso nila ni Daniel, ginagawa nila ang lahat para magpatuloy ang suporta sa kanila ng fans.
“‘Yung sa amin kasi, dapat ‘yung mga taong sumusuporta sa atin, hindi sila mawalan ng rason kung bakit nila tayo sinusuportahan. With good projects and ‘yung quality… ‘yung pakikisama sa kanila. So, ‘yun, hindi naman ‘yun mawawala,” sambit pa ng Kapamilya actress.
Hindi sila gumagawa ni Daniel ng mga bagay-bagay na alam niyang magiging dahilan para tabangan sa kanilang dalawa ang mga tagasuporta nila.
“Sa amin naman kasi ni DJ, nag-usap na kami sa simula pa lang, ‘yung totoo lang ang ipapakita natin sa mga tao.
Hindi natin kailangang ma-pressure sa iba. Kapag kayo na, kailangang umamin na? Basta, kanya-kanyang diskarte lang ‘yan,” sabi pa ni Ms. Kathryn Bernardo. (JIMI ESCALA)
