LEMERY, Batangas – Dinala sa pagamutan ang isang preso na naglaslas ng pulso matapos manakit ng isang kapwa preso sa selda ng Lemery Police Station.
Isinugod sa Batangas Provincial Hospital si Dennis Magboo, 37, taga-Barangay Matingain I sa naturang bayan.
Inireklamo siya ng sariling asawa sa paglabag sa RA 9262 (Anti-Violence Against Women and Children).
Ayon sa report ng grupo ni PO3 Mark Gil Ortiz, dakong 1:40 ng umaga nitong Miyerkules nang makita ng jail guard na may laslas sa pulso si Magboo.
Nauna rito, sinakal ni Magboo ang kapwa preso na si Orlan Macampo at iniumpog ang ulo sa dingding kaya inihiwalay siya sa mga preso.
Nabatid na kinagat pa umano ni Magboo ang isang escort police sa braso na nagsugod sa kanya sa ospital. (Lyka Manalo)
