Ni REGGEE BONOAN
ANG tindi ng kapalit nina Kris Aquino at Ai Ai de las Alas bilang mga hurado sa Pilipinas Got Talent Season 5 dahil tatlong malalaking artista ang makakasama ni Mr. Freddie Garcia, sina Vice Ganda, Angel Locsin at Robin Padilla.
Naaliw nga kami sa mga narinig naming komento nang ipakita ang teaser sa telebisyon ng mga bagong hurado ng PGT5 habang nasa isang drugstore kami.
“Hala, naging masa na ang PGT, hindi na sosyal, kasi wala na si Kris,” sabi ng kahera.
Hirit naman ng pharmacy assistant, “Okay nga sina Vice, Robin at Angel, kasi makaka-relate sila sa pagdadaanan ng mga contestant kasi ‘tong mga ito (artista), dumaan din sa hirap.”
“Pustahan tayo, comedy ang mangyayari diyan, sasakit lang ulo nu’ng Mr. Garcia,” sabi naman ng supervisor.
Oo nga, Bossing DMB, isandaang porsiyentong comedy ang mangyayari sa PGT lalo na kung hindi maganda ang performances ng contestants, tiyak ookrayin sila ni Vice, saka ipagtatanggol naman nina Robin at Angel at si FMG ay tiyak na idadaan na naman sa ngiti.
Hmmm, magiging maluwag kaya si Vice sa mga bading na contestant lalo na kung siya ang peg?
Gayundin kaya si Robin kapag ginaya naman ang pagiging action star niya?
Siguro naman walang mag-o-audition ng naka-Darna outfit.
Anyway, kuwento sa amin ng taga-production, bagamat pinili na sina Vice, Angel at Robin ay sumalang din daw sila sa look test.
“Maraming napili, pero sa final decision ng management, itong tatlo,” sabi sa amin.
Oo naman, halos lahat ay may mga napatunayan na kaya hindi sila puwedeng kuwestiyunin kung ano ang karapatan nilang maging hurado ng Pilipinas Got Talent, di ba, Bossing DMB?
(Kaabang-abang! –DMB)
