Ni Angie Oredo
Sinamantala ng Dallas Mavericks ang pagkawala ni 2014 Most Valuable Player Stephen Curry upang ipalasap ang ikalawang kabiguan ngayong season ng nagtatanggol na kampeong Golden State Warriors, 114-91, noong Miyerkules ng gabi sa American Airlines Center.
Pinamunuan ni J.J. Barea sa kanyang itinalang 23-puntos, 3 rebound at 6 na assist ang Dallas para sa kanilang ika-19 na panalo kontra 13 pagkatalo habang nahulog ang Golden State sa 29-2 panalo-talong kartada.
Hindi nakalaro si Curry sa unang pagkakataon sa season bunga ng lower left leg bruise na inaasang magtutulak din sa NBA leading scorer at kasalukuyang MVP para hindi makalaro sa Huwebes kontra Houston.
Ang Warriors (29-2) ang nanatili na may best 31-laro na pagsisimula sa NBA history na mas maganda sa apat na iba pang koponan.
Hindi naman nakayanan ni Klay Thompson, ang kahati sa tinaguriang Splash Brothers, ang pagkawala sa laro ni Curry matapos na magtala ng 4 of 15 para sa 10 -puntos. Nanguna si Ian Clark para sa Warriors na may 21.
Nagtala si Zaza Pachulia ng kabuuang 14- puntos at 15 rebound habang si Dirk Nowitzki ay nagdagdag ng 18 at walong rebound para sa Mavericks na napanalunan ang kanilang ikaapat na sunod na laro kahit hindi kasama ang injured na point guard na si Deron Williams.
Ang 23-puntos na kalamangan ang pinakamasaklap na kabiguan ng Golden State sapul noong malasap ang 31-puntos na kamalasan sa Houston noong 2013. Ang pinakamasaklap nitong pagkatalo ay noong maghabol para sa titulo ng nakaraang taon sa 15.
Nagawa pa ng Mavericks na itala ang 30- puntos abante sa 83-53 mula sa 3-pointer ni Wesley Matthews, na may naitala na 13 -puntos. Hindi na nakaahon pa ang Warriors, na naghabol pa sa huling walong minuto ng unang yugto, matapos ang pinakamalaking kalamangan ng Mavericks.
Samantala, nagtala si LaMarcus Aldridge ng 21- puntos at 12 rebound upang bitbitin ang Spurs sa dominanteng panalo kontra Phoenix Suns, 112-79, para sa kanilang ika-19th na diretsong panalo sa homecourt sa pagsisimula ng season sa AT&T Center.
Naging matagumpay ang San Antonio sa aandap-andap na 2015 kung saan idinagdag nito si Aldridge mula sa free agency upang makabangon mula sa opening round ng playoffs at simulan ang season sa pagtatala ng franchise record home winning streak.
Itinulak din ng Spurs ang kanilang franchise-record home winning streak sa kabuuang 28 diretsong laro simula pa noong nakaraang season sa pagpigil sa Suns sa ilang record sa pinakamababa sa season.
Ang Phoenix, na nalasap ang ikaanim na sunod na pagkatalo, ay itinala ang season low sa kabuuang puntos, pati sa first-half points (33) at punts sa unang yugto (12).
Nag-ambag naman si Kawhi Leonard ng 19- puntos, si Manu Ginobili ay may 13 at Tony Parker ay nagtala ng 12- puntos at pitong assist sa San Antonio na umangat sa 28-6 panalo-talong kartada.
Hindi nakalaro si Tim Duncan sa ikatlong sunod na laban dahil sa namamaga na kanang tuhod.
