Buong pusong ipinagmalaki ng Philippine Health Insurance Corporation (PhilHealth) ang mga pagbabago sa mga ospital na kanilang katuwang upang maisakatuparan at maging matagumpay ang Z benefit packages ng ahensiya, sa “Z Benefit Summit” sa Marco Polo Hotel sa Pasig City, kamakailan.
Sa temang “Inspiring True Service… Sharing One Vision”, ibinahagi ng partner stakeholders ng PhilHealth ang kanilang mga karanasan at pagsubok sa pagpapatupad ng mga benepisyo sa ilalim ng Z packages.
Pinatunayan ang kahalagahan ng matibay na pakikipag-ugnayan sa mga pasilidad-pangkalusugan, ipinahayag ni Alexander Padilla bilang pangulo at punong tagapagpatupad ng PhilHealth, ang pagnanais ng tanggapan na maipagkaloob ang mas maayos na serbisyo sa ating mga kababayan.
“Our desire to achieve better health outcomes, especially for those who have higher chances of survival, has prompted us to introduce the Z packages in 2012. It was a real challenge and our journey towards strengthening our members’ financial risk protection through the Z benefit packages has made us realize a lot of things that will certainly help us enhance these packages some more,” ani Padilla.
Saklaw ng Z Benefit packages ang acute lymphocytic leukemia, breast at prostate cancer, kidney transplant, coronary artery bypass graft, ventricular septal defect, tetralogy of fallot, cervical cancer, piling orthopedic implants, mobility prosthesis, orthosis, rehabilitation, prosthesis help, at peritoneal dialysis first (PD First).
