NAPASYAL ang showbiz friend namin sa pictorial ng mga bida sa isang indie movie. Naabutan niyang kinukunan ng kilalang photographer, sa mismong studio na pag-aari nito, ang magandang not so young actress.
Akala ng aktres ay puwede na siyang umuwi pagkatapos ng ilang shots sa kanya. Kaya ipinaligpit na niya sa kanyang alalay ang mga gamit nila, kasama ang mga damit na isinuot niya sa pictorial.
Pero nagdayalog bigla ang namamahala sa produksiyon at sinabihan ang aktres na hindi pa siya tapos dahil hihintayin pa nila ang young actor na kasama niya sa pelikula, may mga kukunan pang magkasama sila.
Dahil masunurin si Aktres, wait na lang ang beauty niya. Umabot sa isa, dalawa, at hanggang tatlong oras, ni anino ng aktor ay waley sa bisinidad. Gusto na sanang umuwi ni Aktres dahil ilang oras na nga naman siyang nabuburo sa loob ng studio.
Lahat ng naghihintay sa young actor, nagpupuyos na ang kalooban sa pagpapahintay nito.
Maglilimang oras na ang waiting game nang finally ay dumating ang kanilang hinihintay na young actor, na kahit alaga ng isang network ay nananatili pa ring starlet.
Inakala ng aktres at ng lahat ng mga kasama nilang naghintay na kahit pabalat-bunga ay hihingi ng dispensa si Young Actor pero dedma ito, huh!
Ang siste, kailangan pa ring maghintay si Aktres dahil dapat din namang naka-makeup ang unprofessional na aktor.
Halos isang oras pa ulit ang ipinaghintay ni Aktres.
Pero ang ikinaloka ng source namin, nang kukunan na ang dalawa ay halos hindi makilala ni Aktres at ng iba pang mga tao sa studio ang kasama niya.
“Paano ba naman, kung anik-anik ang inilagay sa mukha ni ______ (young actor) na sa utos yata ng namamahala ng produksiyon na palabasing multo siya,” natatawa pang kuwento sa amin ng source namin.
“Asus, multo pala ang inaantay ko,” pabulong na dayalog na lang daw ng aktres.
Sey ng source, naasar yata ang production kaya inutusan ang makeup artist na nadamay din sa paghihintay at naasar sa kawalan ng modo ng starlet actor, kaya pinagmukha siyang bangkay.
‘Buti nga!
