HUWAG ANG ANAK KO! ● Akala ng isang ina sa Kosovo, mamamasyal lamang ang kanyang mag-ama sa bundok nang ilang araw lang noong Hulyo. Pagkaraan ng ilang buwan, umuwi rin naman ang mag-ama ngunit laking gulat ng ina sa kung ano ang dinanas ng kanyang anak. Ayon sa isang ulat, napag-alaman na sinanay pala ng jihadi na ama ang kanyang anak para sa isang spy agency ng Kosovo. Nang muling makita ni Zena Abazi ang kanyang anak, hindi mailalarawan ng mga salita ang kanilang mga damdamin.
Hinihimok ng mga extremista sa Syria ang mga jihadi na umanib sila sa kanilang samahan kasama na pati ang kanilang mga anak upang sanaying maging mga mandirigma. Nang malaman ito ni Abazi, umapela siya gamit ang media na huwang idamay ang kanyang anak sa kabila ng pagdami ng mga batang sumasali sa Islamist radicals sa Iraq at Syria. “I want him to go back the life he had,” ani Abazi sa media. “I’m not dealing with what went on there.” Hindi ko maintindihan ang kanilang relihiyon dahil pati musmos isinasalang nila sa panganib. Ang religious extremists na ito ay salot sa sangkatauhan. Hindi nila iginagalang ang buhay. Mahal ng Diyos ang Kanyang mga anak, kaya nga isinakripisyo Niya ang Kanyang sarili dahil sa pagmamahal na iyon. Ang isinasakripisyo naman ng mga extremista ay ang buhay ng iba.
PARANG SA MALL ● Kamakailan, madaling araw, labing isang pasahero sa loob ng isang public utility bus ang hinoldap ng dalawang lalaki sa East Avenue, Quezon City. As usual, nagpanggap na pasahero ang dalawang demonyo sa Taguig Metrolink Bus at nagdeklara ng holdap. Nagpaputok ang isa sa dalawang ungas sa sahig kaya naghintatakutan ang mga pasahero. Nilimas naman ng kasamang demonyo ang salapi at cellphone ng mga kawawang pasahero. Hay… ang lakas ng loob ng ilang kampon ni Satanas kasi wala silang kinatatakutan. Kung paiiralin ang death penalty, tiyak na magdadalawang-isip ang mga unggoy bago gumawa ng krimen. Sapagkat hindi naman maiiwasang sumakay ng bus o jeep, at dahil wala naman tayong nakikitang death penalty dahil sa pagbabanal-banalan ng ilang kinauukulan, magpatupad sana ng safety measures. Bakit hindi natin gayahin ang pag-iinspeksiyon ng mga bag bago pumasok sa mga mall? Bakit hindi kapkapan ang mga pasahero ng mga patalim o anumang deadly weapon? Maaaring maabala lamang tayo ng kaunti sa ating pagsakay dahil sa inspeksiyon ngunit ligtas naman tayong makararating sa ating paroroonan.
