FINALLY, nakapanood kami ng “My App Boyfie” episode ng Wansapanataym noong Sabado dahil malakas ang ulan kaya stay home lang ang drama namin.
Hindi pa kasi kami masyadong solved sa tambalang James Reid at Nadine Ilustre na para sa amin ay copycat lang nina Daniel Padilla at Kathryn Bernardo lalo na sa pelikulang Ang Diary ng Panget na astig-astigan ang papel ng una.
Pero bagay naman silang love team, in fairness dahil may kilig naman sa viewers kaya siguro marami na talaga silang supporters.
Naaliw naman kami sa napanood naming episode ng “My App Boyfie” dahil may ibang karisma naman si James kumpara kay Daniel kaya marami ring girls na nababaliw sa kanya.
Lalo na sa eksenang naglaro siya ng basketball na talagang pinahanga niya ang lahat gayong wala naman dapat siyang pakiramdam dahil robot lang naman siya at may selos factor siya kay Dominique Roque.
Hindi sila magsiyota at hindi rin nagliligawan sa tunay na buhay kaya nakakatuwa na malakas ang kilig na ipinararamdam nina James at Nadine. Nasasakyan ng viewers ang pag-arte nila na may ‘something’ sila.
Sa madaling salita, magaling silang umarte bilang magsiyota.
Ayon sa production, mapapanood naman sa episode bukas at sa Linggo kung paano susubukin ang lalim ng samahan ng mga karakter ng JaDine dahil makararamdam ng selos si Jowa habang napapalapit na si Anika sa ultimate crush nito sa school na si Melvin (Dominique).
Sino kaya ang mas pipiliing makasama ni Anika — si Melvin na matagal na niyang crush o ang “app boyfie” niya na si Jowa na nagparamdam sa kanya kung paano magkaroon ng kasintahan?
Malamang nito, kahit walang ulan ay stay home uli ang drama namin bukas at sa Linggo para malaman namin ang mangyayari. Me ganu’n? JaDine follower na rin yata kami, he-he….
