ANG saya-saya ng mga katotong nagdiwang ng kanilang kaarawan simula Enero hanggang Setyembre dahil nag-treat sa kanila si Quezon City Mayor Herbert Bautista ng lunch sa Vera-Perez Garden kahapon.
May kanya-kanyang mesa na nakalaan para sa bawat grupo sa bawat buwan na isa-isang nilapitan lahat ni Bistek para magpa-picture, kasabay na rin ng pag-blow ng candles sa cake.
Bihirang makatsikahan ng press si Bistek kaya hindi na namin pinakawalan ang pagkakataon. Agad siyang tinanong tungkol sa guesting niya sa Aquino & Abunda Tonight nang humingi siya ng public apology sa ginawa niyang pananampal sa nahuling suspected drug pusher na nakuhanan ng shabu na nagkakahalaga ng P15-M.
Sabi ni Mayor Herbert, naging maganda ang resulta ng guesting niya sa programa nina Boy Abunda at Kris Aquino dahil naipaliwanag nang maayos ang nangyari, at dahil naniniwala siya na iba naman ang market na nanonood sa A&A.
“I know na ‘yung market ng nanonood ng A&A is different from Tunying (Tapatan ni Tunying ni Anthony Taberna) and DZMM. Kaya rin ako nag-guest doon para ipaliwanag kung bakit ko ginawa ‘yun sa drug pusher,” kuwento ni Mayor Herbert.
Nag-iisa that night si Kris dahil maysakit si Kuya Boy, kaya tinanong si Herbert kung hindi ba siya nailang na ang ex-girlfriend niya ang nag-interbyu sa kanya.
“Wala namang problema sa aming dalawa, even if you gonna watch the entire segment, it’s purely professional,” sagot ni HB.
Napangiti ang actor/pulitiko nang may magbanggit sa sinabi ni Kris na hindi siya marunong manakit ng pisikal kundi feelings lang.
“Ano talaga ng babae ‘yan, punchline talaga, kung baga sina Pugo at Patsy, ako si Pugo, siya si Patsy,” birong sabi ni Herbert.
Marami ang nakakapansin na malaki na ang ipinagbago ngayon ng Queen of All Media, na ayon kay Herbert ay, “Eh, baka marami siyang ginagawa, marami siyang iniisip, maraming plano, maraming lumiligaw-ligaw siguro, di ba? Si Derek (Ramsay),” kaswal na sabi ni Mayor.
Nagseselos ba si Bistek, kaya binanggit niya ang pangalan ni Derek?
“Eh, nababasa ko sa diyaryo, eh,” salag ni Mayor HB.
Sabi namin, bakit niya binanggit kung wala siyang ibig sabihin?
“Wala naman ‘yun, puwede ko rin namang banggitin si James (Yap), ang daming puwedeng banggitin,” katwiran niya.
Samantala, okay na raw ang friendship nila ngayon ni Kris, kaya ibig sabihin ay open na ulit ang komunikasyon nila.
“Once in a while, pero hindi madalas,” say ni Mayor.
Sa ngayon ay walang lovelife si Herbert dahil ang priority niya ay ang mga anak niya, at ang trabaho niya bilang ama ng Quezon City.
“What happened (nu’ng sila ni Kris) was an eye opener talaga for my kids, I prayed that they’ll become stronger because of that experience,” sabi pa niya.
May natutuhan din siya sa naging relasyon nila ni Kris.
“Ano, eh, no matter what, maliit lang ang mundo na ginagalawan natin. She belongs to a political family, I grew up in public service, magbabarkada naman kami lahat, sina Junjun (Binay), ‘kita-kita kami, maliit lang ang mundo.
“If we go to the other side of the world, maliit din ang mundo, and our children are growing up, they could be friends, they could be co-workers in the future, wala namang problema. Wala akong masamang tinapay sa kahit kanino.
“And I think, she also feels the same way, kaya siguro naging kaibigan din niya si James and I’m looking forward na magkausap-usap din sila nina Kuya Ipe (Phillip Salvador) at saka ni Mayor Joey (Marquez) para okay.
“May nabasa nga ako na, huwag kang manatiling galit dahil ang masasaktan doon ay hindi naman ‘yung taong ikinagagalit mo, kundi ikaw lang. Life is short, eh,” pahayag ni Bistek.
Samantala, may nagtanong na kung may binabalikan si Bistek sa naging ex-girlfriends niya.
“I’m committed to my kids at sa work ko. It’ll be unfair, basta alam n’yo naman ang drama ng buhay ko, eh. I maintain my friendship and my respect to the mothers of my children; I ask for forgiveness if I’ve done something wrong to any one of them,” paliwanag ni HB.
At labis siyang humahanga sa maayos na pagpapalaki ng mga ina sa mga anak niya dahil magagalang at God-fearing.
Pangarap din niyang makasal, pero, “Time does not allow me,” say ni Bistek.
