Handa ang Research Institute for Tropical Medicine (RITM) na magsagawa ng experimental treatment sakaling makapasok sa bansa ang Ebola virus.
Ayon kay RITM Director Dr. Socorro Lupisan, wala naman silang problema sa paggamit ng alternatibong paraan para magamot ang Ebola virus basta’t aprubado ito ng World Health Organization (WHO).
Nauna rito, sinabi ng WHO na kailangan ng mag-eksperimento para magamot ang Ebola lalo na at wala pang rehistradong gamot o bakuna kontra rito.
Ngunit sa ngayon, ayon kay Lupisan, ang pinaghahandaan nila ay ang posibilidad na makapasok sa bansa ang ebola virus.
Ang RITM ang siyang naatasan ng Department of Health (DOH) na humawak sa mga pasyente na maaaring maapektuhan ng virus.
Sa pinakahuling datos ng WHO ay lumilitaw na may 1,702 kaso na ng Ebola kung saan 931 ang namatay mula sa Guinea, Liberia, Nigeria, at Sierra Leone.
