“BIRUAN namin ni Mama, bukas wala ka nang career,” tumatawang sabi ni Arjo Atayde nang tanungin namin tungkol sa eksena nilang mag-ina sa Pure Love.
Wala pala siyang idea na papasok sa serye nila si Sylvia Sanchez, kaya, “Masaya ako nu’ng nalaman ko, kasi isa naman talaga ‘yun sa goal ko o dream ko, makaeksena ang nanay ko.
“Kasi normally ‘pag may kausap akong mga artista, sinasabi magaling siya, pero never ko pa siyang nakaeksena kaya hindi ko alam.
“Pero bilang anak, nasanay lang ako na nandiyan siya lagi, nakakausap ko, kaya hindi ko nakikita ‘yung pagkaartista niya. So, eventually, after this (eksena nilang dalawa), humanga na ako pagkatapos, intense ‘yung scene at drama talaga, at doon ko lang nakita na, ‘ay, artista talaga’ at doon ko lang napatunayan na magaling nga talaga siya,” kuwento ng proud son ni Ibyang.
Hindi ba siya kinabahan o nag-alangan na baka lamunin siya ng kanyang ina sa aktingan?
“Hindi naman, kasi ‘pag magaling naman ang kaeksena mo, hahatakin ka naman pataas, di ba?
“‘Yung nilamon, hindi naman, siguro it’s for you guys to judge. But I don’t mind kung sabihing nilamon ako, it’s because she’s there for how many years already at napakagaling at isa siya ‘yung ‘tinuturing kong magaling na aktres sa industriya and I don’t take it against that. Ang goal ko lang sa eksenang iyon, eh, makasabay man lang ako sa kanya,” sagot ng binata.
Inamin niya na ang nanay niya ang kanyang mentor at critic.
“Sabi lang niya, ‘magaling ka talaga’. After the scene, nag-text siya, sabi niya, ‘magaling ka nga’. Natuwa ako kasi siya ‘yung mentor ko talaga. Kung may problema sa acting ko at may nakita siyang mali, nagtetext kaagad siya sa akin. Nakatututok ‘yan, eh. ‘Pag may episode siyang hindi napanood, may I Want TV, doon siya,” sabi ni Arjo.
Oo nga naman, saan ba nanggagaling ang bunga, e, di sa puno, di ba, Bossing DMB?
Samantala, tungkol naman sa nude photos na kumalat sa social media na inakala ng lahat na si Arjo dahil kamukha raw, tuwang-tuwa pa ang aktor sa halip na magalit.
“Sobrang nagpapasalamat ako sinuman ang nag-upload kasi ang ganda ng katawan nu’ng guy, eh, hindi naman maganda katawan ko, ha-ha-ha. Kaya sobra-sobrang salamat talaga.
“But it’s not me, and besides, hindi ko naman gagawin ang ganu’n. Wala akong ganu’n (sex video),” say ni Arjo.
Hindi niya naiisip gawin ang ganoon dahil, “Self-respect lang, at sa girl you’re with. Dignity mo ‘yun, eh, so I don’t agree with that,” katwiran ng binata.
