Patuloy ang clinical trials sa lagundi bilang COVID therapeutic—DOST

Filed under Opinyon Balita RSS RSS Feed

ni Charissa Luci-Atienza

 TULOY at mangangailangan ng mas maraming volunteers ang clinical trials sa paggamit ng lagundi (Chinese chaste tree) bilang coronavirus disease (COVID-19) therapeutic o supplement.

Ito ang ibinahagi ni Department of Science and Technology (DOST) Secretary Fortunato T. de la Peña sa kanyang weekly report nitong Biyernes.

Bilang pagsipi sa DOST-Philippine Council for Health Research and Development (PCHRD), sinabi ng kalihim na nasa Stage 2 na ang clinical trials at sumasailalim na ang mga participants sa screening at recruitment.

“The screening and recruitment of participants for Stage 2 of the study is ongoing,” ani de la Peña.

Nitong Pebrero 19, aniya, nag-enrolled ang proyekto ng kabuuang 75 participants mula sa limang study sites o quarantine facilities.

Para sa Stage 2 ng pag-aaral, target naman ang bilang na 200 qualified volunteers.

Hunyo 2020, nang ianunsiyo ang clinical trials para sa lagundi na inaprubahan ng DOST-PCHRD. Abril nitong nakaraang taon, sinimulang pag-aralan ng DOST ang bisa ng ilang halamang gamot laban sa COVID-19.

Kilala ang Lagundi bilang gamot sa ubo.

Habang noong Agosto 2020, inaprubahan ng Food and Drug Administration (FDA) ang clinical trials sa lagundi bilang supplemental treatment laban sa COVID-19.