Balanza, NCAA POW

Filed under Basketball Balita RSS RSS Feed

ISANG taon na ang nakakaraan, sumailalim sa isang maselang operasyon si Jerrick Balanza upang matanggal ang tumor na tumubo sa kanyang utak.

Himala o gabay ng Panginoon, isang malusog na Balanza ang nagbabalik-aksiyon para sa kampanya ng Letran sa NCAA men’s basketball championship.

Ipinagdiwang ni Balanza ang kanyang ika-23 taong kaarawan nitong Biyernes sa paggabay sa Knights, 88-64, kontra College of St.Benilde sa ipinoste nyang game-high 26 puntos mula sa 8-of-13 shooting sa field.

Dahil dito, siya ang napiling Chooks-to-Go Collegiate Press Corps NCAA Player of the Week.

“Ayun nga kasi, nabigyan pa ako ng isang taon, bagong isang taon. So [ngayon], yung sinasabi ko is lahat ng opportunity na dadating sa buhay ko, ima-maximize ko talaga dahil bihira lang yung nabibigyan ng ganito eh,” ani Balanza.

Dahil din sa panalo, nakabangon ang Knights mula sa dalawang sunod na pagkabigo at nakapuwersa ng 4-way tie sa ikalawang posisyon kasama ng Lyceum, San Sebastian at ng Blazers taglay ang barahang 6-3.

Tinalo ni Balanza para sa lingguhang citation dina Calvin Oftana ng San Beda at Allyn Bulanadi ng San Sebastian.

-Marivic Awitan