NU Spikers, lumapit sa UAAP title

Filed under Volleyball Balita RSS RSS Feed

ISANG panalo na lamang ang kailangan ng National University upang mapanatili ang men’s title matapos padapain ang Far Eastern University , 21-25, 25-23, 25-23, 25-18, kahapon sa Game 1 ng kanilang UAAP Season 81 Volleyball Finals sa Araneta Coliseum.

Nabigo noong opening day sa Tamaraws, ang panalo ang ika-15 sunod para sa Bulldogs ngayong season na naglapit sa kanila sa asam na ikalawang sunod at pang-apat na men’s volleyball crown.

Mula sa dikdikang laban sa unang tatlong sets, tila sasakyang naubusan ng gas sa fourth frame ang Tamaraws dahil mula sa 4-0 pagkakaiwan ay di na sila nakaporma sa kalaban hanggang sa tuluyan silang layuan sa iskor na 20-13.

“Lumamang kami sa experience namin sa championship and yun ang nagamit namin sa larong ito,” pahayag ni NU coach Dante Alinsunurin.

Pinangunahan ni James Natividad ang nasabing panalo sa ipinoste nyang 16 puntos mula sa 15 attacks at isang service ace.

Ang Game 2 ng serye ay magaganap sa Miyerkules sa SM Mall of Asia Arena sa Pasay City.