Ni Jimi Escala
SI Congresswoman Vilma Santos ang isa sa mga pinasalamatan ni Angel Locsin nang tanggapin ang napanalunang Ani ng Dangal award mula sa National Commision on Culture and the Arts (NCCA).
Ayon kay Angel, hindi niya maaaring kalimutan si Ate Vi na binigyan siya ng pagkakataong makatrabaho ito sa pelikulang Everything About Her ng Star Cinema.
“Thank you so much po sa lahat ng bumubuo ng National Commission for Culture and the Arts, especially po kay Chairman Virgilio Almario, for this huge honor. It’s a privilege to be given recognition by our country for your passion.
Again, thank you so much po. Sorry I wasn’t able to make it to the celebration for I was out of the country. To my ABS-CBN and Star Cinema Family, Tita Malou Santos, & Inang Olive Lamasan, thank you po! Direk Joyce (Bernal), salamat! Ms. Vilma Santos, you are and forever will be our Star for All Seasons. Thank you po, Tita for the privilege na makatrabaho po kayo. Para po ito sa ating mga Pilipino. ❤️ #AniNGDangalAwards.”
Naroroon sa Japan si Angel kasama ang boyfriend na si Neil Arce nang ganapin ang gawad parangal kaya hindi niya personal na natanggap ang kanyang tropeo.
Samantala, naglabas din ng saloobin si Angel tungkol sa naging pahayag niya sa performance ng all-girl sexy group na Playgirls. Nag-no siya sa performance ng nasabing grupo.
“Sa totoo lang naman, eh, may kanya-kanya tayong utak, eh, at karapatan natin na magsalita kung ano’ng gusto natin.
Mahal na mahal ko kapwa judges ko, mahalaga kami sa isa’t isa, hindi kami nagbabastusan, pero siguro, siniseryoso lang namin itong ginagawa namin,” katwiran ng mahusay na aktres.
Idinagdag niya na binigyan naman ang lahat ng pagkakataon na makapagpahayag ng saloobin.
“Kaming apat na judges, eh, bukas kami kung ano ang opinion ng isa. Talagang ‘nirerespeto namin ang bawat isa sa amin.”
Nilinaw niya na walang pikunan sa mga hurado ng Pilipinas Got Talent.
“Siguro lang, eh, mas kailangan na maghanda ang mga contestants kasi seryoso na ito talaga. Magagaling din ang ibang contestants, kaya dapat magpakita sila ng kakaiba at pinaka-the best na performance na maibibigay nila talaga,” lahad pa ng aktres.
