Inirekomenda ng National Bureau of Investigation (NBI) ang pagsasampa ng kaso laban kay Senator Leila de Lima, ilang government officials at inmates sa New Bilibid Prisons (NBP) sa Department of Justice (DoJ).
Paglabag sa Dangerous Drugs Act at Anti-Graft and Corrupt Practices Act ang kasong isasampa laban kay De Lima, sa pangunguna nina NBI spokesman Ferdinand Lavin at Anti-Illegal Drugs Division (AIDD) chief Joel Tovera.
Inirekomenda rin laban kay De Lima ang paglabag sa Republic Act (RA) 6173 o Code of Conduct and Ethical Standards for Public Officials and Employees.
Ang hakbang ay base sa kanilang preliminary investigation na inumpisahan noong Oktubre 4.
Bukod kay De Lima, pinakakasuhan din sina dating Bureau of Corrections (BuCor) chief Franklin Bucayu, dating Justice Undersecretary Francisco Baraan III, at dating BuCor officer-in-charge (OIC) Rafael Ragos. Direct bribery at paglabag sa Anti-Graft & Corrupt Practices Act, RA 6173 ang kasong kakaharapin ng mga ito.
“We have interlocking connections, sanga-sanga ito. ‘Yung sinabi ng isa, vinalidate nung isa, kinorroborate ng isa. I believe we have a good case,” ayon kay Lavin.
Sangkot din sa kaso sina Ronnie Dayan at Joenel Sanchez na dating mga tauhan ng Senadora, NBI Intelligence Agent Jovencio Ablen Jr., Wilfredo Elli, Julius Rejuso, isang alyas ‘George’, Lyn Sagum na assistant ni De Lima at Jesusa Francisco.
Pinakakasuhan din sina Jaybee Sebastian, Herbert Colangco, Wu Tuan Yuan alias Peter Co, Engelbert Durano, Vicente Sy, at Jojo Baligad na inmates sa NBP. (Argyll Cyrus B. Geducos)