Vilma Santos, komporme sa bawal nang pabonggahan ng gown sa SONA

BAWAL na ang patalbugan ng kasuotan sa lahat ng mga dadalo sa State of the Nation Address (SONA) sa Lunes. Kaya tiyak na mami-miss ng mahihilig sa fashion ang pag-aabang sa mga bonggang kasuotan ng mga kagaya nina Asssunta de Rossi, Dawn Zulueta, Jinkee Pacquiao, Lucy Torres at ng isa sa inaantabayan ng lahat na bagong kongresista na si Cong. Vilma Santos.

Pero ayon sa Star for All Seasons na tiyak na ang pagdalo kauna-unahang SONA ni Pres. Rody Duterte, walang problema sa kanya ang pagbabawal sa mga bonggang kasuotan sa naturang event. Aniya, ang mensahe ng presidente ang mahalagang pagtuunan ng pansin sa araw na ‘yun.

“Okey lang. For me wearing a dress is more comfortable. It’s true… what is important on that day is the message of our president,” sabi ng first ever congresswoman ng sixth district ng Batangas.

Ayon kasi sa incoming finance department spokesperson na si Paola Alvarez, hindi dapat magmukhang fashion show ang SONA na kinaugalian tuwing isinasagawa ito. Dapat umanong isentro ang okasyon sa mensahe ng bagong pangulo.

“Tama ‘yun,” susog ni Cong. Vi. “Nakataya ang bansa natin sa message ni Pangulong Rody Duterte. We will just be presentable being public officials.”

Aware ang esposa ni Sen. Ralph Recto sa inilabas na kautusan ng Malacañang na dapat ay business attire pero hindi pa rin naman daw mawawala ang Filipiniana sa kababaihan, hanggang tuhod lang at hindi ‘yung abot hanggang sahig.

Halos kinamulatan na nga naman na isa sa talagang pinag-uusapan pagkatapos ng SONA ang mga kasuotan ng kababaihan, mga misis ng mga senador, kongresista, iba pang mga pulitiko, at maging mga imbitadong guest na pinalalabas ng mga fashinosta na nagpapatalbugan ng gowns.

Samantala, naitanong din namin kay Ate Vi ang tungkol sa pinag-uusapang pagpapakilala sa kanya ni Jessy Mendiola na sinasabing girlfriend na ngayon ng panganay niyang si Luis Manzano at siyempre kasabay na rin ‘yung sunud-sunod na paninira ng bashers na obvious naming fans ng ex-girlfriend ng kanyang anak.

“’Pag mabuti ang pagkatao ng isang tao, mahirapan kang makalimutan. ‘Pag hindi maganda ang pagkatao ng isang tao, madali mo siyang makakalimutan,” diretsong sagot ng Star for All Seasons.

Mukhang may hugot lines na rin ang paborito naming aktres?

“Well, ‘yun lang ang sagot ko!!! At wala nang paliwanag ang sagot kong ‘yan. Period,” sey pa ng nag-iisang Vilma Santos-Recto. (JIMI ESCALA)