Patuloy na lumulobo ang bilang ng tagasuporta ni Sen. Francis “Chiz” Escudero sa kanyang kandidatura sa pagka-bise presidente.
Ito ay matapos magdeklara ng suporta sa kanya ang People’s Coalition for Progressive Philippines (PCPP) at Confederation of Coconut Farmers Organization of the Philippines (CONFED).
Kabilang din sa nagdeklara ng suporta kay Chiz, katambal ni independent presidential candidate Sen. Grace Poe, ay ang Tri-Council Mindanao.
Ang PCPP ay isang koalisyon ng 146 na socio-civic organization na may 15 milyong miyembro sa iba’t ibang bahagi ng bansa, ayon kay Chairman Manuel Barbara Jr.
Lumagda si Barbara at ang mga miyembro ng PCPP Board of Trustees sa isang manifesto na naghahayag ng kanilang suporta sa kandidatura ni Chiz.
“This is an assurance that the coalition will work for the election of Sen. Chiz Escudero as vice-president of the Republic of the Philippines,” ayon kay PCPP Vice President for Legal Affairs Atty. Rogelio Bolivar.
Aniya, inabisuhan na ang lahat ng kanilang miyembro na bumoto at huwag kalilimutang ilagay sa balota ang pangalan ni Escudero sa Lunes. (Leonel Abasola)